kiwis si gschicht, its si d kangaroos am start

kia ora (heisst so viu wi sallee zaemae uf maori-ianisch :)
hmm, aber i bi nid mau meh in neuseeland, naemlech. isch its no so tiffig vrbi gangae die zyt. what haeppen?

eja, i daenke es macht ke sinn doert ds hoere woni ghoert ha. schuesch gits immer numae gschichtae us dr meh entfernterae vrgangae heit, aber i daenke es macht nid viu sinn. drum fani its mau mit mirae zyt in oustralie, just all good.

auso, bi am 17. maerz ds melbourne acho u ha de usserhaub vom flughafae o grad so ae chlinae shuttlebus gseh wo st. kilda isch drufgstangae. das viurtu isch mir vo viunae empfohlae wordae. dr fahrer het mi aeuae de o gfragt ob i wot mitfahre: "you, xyz xyz xyz....., st. kilda?" isch mir aemu aus fragend ueberecho, u sehr hiufrich isch o gsi das er mit em finger uf mit het zeigt. bini aemu sicher gsi das er oeppis vo mir wot u nid oeppis vor sech haerebrumlet. i de so mit mim perfektae aenglisch u mit emnae smile im gsicht> "oehm, ja, aehh, yes please". eja, het aemu schlussaendlech klappt u aer het mi nach st. kilda gfahrae. u da i nuet ha im vorus ha buechet gha, u aer het gmeint das aus very buisy isch, auso zimlech vou, fuer die wo ds englisch no nid so beherrsche wi i, het aer mi vor em "the oslo hotel"-backpackers la usstigae, so wit isch aus sweet azz. u sweet azz isch so zimlech aus was guet, geil, schoen usw. isch, kiwi slang aebe, womi haut einehaub monet praegt het.
item, ga auso i das backpacker, zahle drue naecht im vorus, u steue gli drufab fescht, das das aeuae die siffigschte (umgs. fuer ecklig) ruemlechkeite si gsi woni je drin pennet und duschet ha. eh nu, uf dae shock bini mir de mau es sixpack vb's ga poschtae, ha mir ae gmuetleche aebe gmacht, u de isch de das nur no haub so schlimm gsi :)
item zum zwoeite, us denae drue naecht i daem soustau si haut de glich saechs wordae, bi haut ersch am drittae tag mini witerreis ga buechae, u wenns de haut heisst das ersch am sunnti es plaetzli im bus frei isch, tja, hani haut no drue naecht meh doert vrbracht. mi gwoehnt sech ja o fasch a aus. u schlussaendlech hei mi geng no keni bedbugs (bettchaefer, fuer die nid aenglisch versierte) bissae, u das fingi, was daenket dir, ja genau, sweet azz bro, it's all good.

aja, st. kilda, es schoens auternativs flaeckli vo melbourne, melbourne ae grossi stadt, viu hochhuesser, viu luet, viu kaffees, wimes so kennt vo de biudli u dr paschgi choufft sech zwe pulli i, macht nid wuerklech sinn im heisse oustralie daenket dir, heit dir raecht. aber ke zyt da noecher drufidsga. choeme mir zum erwaehnte sunnti.

wobi, am samschti bini zersch no uf d phillip islands ga ne pingu parade luegae. isch herrlech. bi sunneuntergang watschle di pingus i chlinae grueppli us em meer uebere strand zu ihrne hoehline oder schlaffsteue u blibae sta. jöööööööööööööööööh, isch auso wuerklech haerzig gsi, u das isch mir sogar es copypaste vom ö waert gsi.

a daem tag hani o mini erschtae kangaroos gseh, aber nid wiudi, so im ne strichuzoo haut, aber naer ab dr reis vom sunnti ueber d great ocean road u ueber d grampians (das isch waud, gaaaaaaanz viu waud) uf adelaide, hie bini uebrigens grad, hani se de o wiud gseh. isch tiptop so, mi freut sech druf u gseht se im zoo, park, whatever, vo ganz noechem, het freud, me strahlet, macht foeteli, mi fuetteretse, u foeteletse nomau, u nomau. u de gseht me se in wiud, u macht wider foeteli u isch froh, se o wiud ds gseh, wo si sech frei bewege, u daenkt sech, isch das its aus gsi, wasi mit kangaroos cha machae u wini se gseh? noe nuescht. i ha se du de o gaesse. so a la, ich kam, sah und ass sie, hehe.

isch nid so schlaecht so kangaroomeat. wobi, i muess es de no mau probiere, wenns nid so trochae duraebraetlet u mit zimlech schwarzer chruschtae isch. u das bringt mi zur naechschte story, nid wahr. mir si auso i daem grampians national park, im ne chlinae putzigae doerfli im niene. umgae vo waud, papageie i de boeim wo wi affae toenae u x kangaroos wo ir sichtnoechi am grasae si. hae, da stunet dir (oder it's stunning, fuer die wo lieber aenglisch hei) isch wuerklech ae super kulisse gsi. u de hets abe a daem aebe es barbecue gae. u uesi busfahrerin het aus das vilae fleisch eifach so uf ae grill gschossae, so ganz lieblos, ohni gfueuh, aus ueberenang u chruz u quer u i has eifach nuemm mit choenne aluege. so ha i mir ir chuchi dr grillzange u es vb (victoria bitter, bier) ghout, u ha das richtig afa bueschelae. wi sechs ghoert, d frouae drin ds gmuess am schnaetzle u i dus am grill, hoeuhoeuheou (tim taylor maessig bitte). bi nid ganz allei gsi, ae duetsche het ono woeue mitmischae, aber daem hani de schnaeu zeigt waer ds zepter ir hang het.
i ha das auso bueschelet, winis vom mi master, thanx dad, ha glehrt u zum fleisch gluegt. u hie u das es fleisch draeit wou dr gas grill isch doch zimlech heiss gsi u ab und zue hets duers fett no es flaemmli gae. u mit hets ja nid gaern akohlet oder. u de chunnt die busfahrerin wider u schmeisst no meh fleisch druf, wider so ueberenang u duerenang u seit zu mir, i soeu nid so mit em fleisch spilae. halloooo, i mit em fleisch spilae, schliefts. es deluxe barbecue wot i nech zaemae zouberae, feins zarts kangaroo fleisch, liecht bluetig und und und. aber tshue, i u mit fleisch spilae, das lani mir auso nid zwoei la mau saege u bi liecht beleidigt drvogloffae. u was het meh drvo: zum aesse gits trochnigs fleisch u vrchohlet, i wot its nid igebiudet si, aber i haets definitiv besser haere brcho, naemlech.

so, i steue grad fescht das i extrem mued bi u mini barbecue gschicht nid das haere git woni afangs daenkt ha. e nu, loesche manis o nuem.

bis gli, haebet sorg, gniesset oei bedbugs freie better.

liebe gruess us adelaide

p.s. foti fuegi morn eis drzue, brchumae wider einisch d spichercharte nid usae. mit dr pincette geits aber, aber wi gseit, bi fulae, drum morn...