sallee zämä
so, i schribä doch mau mi erscht blog itrag. u zwar nid öppä vo london, singapur oder sidney us, nei, us em schönä bern, im büro vom mami ar mittustrass.
das flügzüg us london, wo mi widerum uf london hät söue steue isch eifach nid am start gsi, bzw. 2 stung ds spät. u so hät i haut mi aschluss flug ds london für uf sidney vrpasst. ds frolein ;-) het zwar zersch gmeint es längi de scho, müess haut eifach de chle tiffig secklä u i sig ja no ä jungä bursch. aber wo i de im roucherstübli am flughafä di zitä nomau dürä bi, hani mit mim super chopfrächnä festgsteut, das i ja no gar nid glandet wär we dr aschlussflug scho ir luft isch. iu, dä hät de aus rennä nüm bracht u sowiso, ma doch nid i de flughäfä umerennä, hallooo, i ha ferie, wenschon söuä si mi tragä :-)
ds frolein het mir du de o rächt gä u drum flüg i haut ersch hüt, nüm via london u singapur, nöi über frankfurt u tokio.
für mi passts, ha so nomau zyt gha uf bern ds cho u liebi fründä ds träffä bevors its de würklech los geit.
merci pato u remo für d'übernachtigsmüglechkeit u aunä für ä härzlech empfang, het mi risig gfreut! sit äbä scho au di geilschtä!
jäh, das wärs fürs erschtä. dr nächscht itrag söt de nüm us dr schwiz cho, aber mi weiss ja nie.
mis fazit: ha ja scho vo afang a gseit das i am mäntig am 29.01.08 flügä ;-)
cheers
